~~~~~~~~⊰❂ unicode ❂⊱~~~~~~~~
ရှမ်းပြည်နယ်အရှေ့ပိုင်းဒေသ၊ တာချီလိတ်မြို့၊ ဆန်ဆိုင်း(ခ)ရပ်ကွက်ထဲမှာ ကရင်အမျိုးသား စုပေါင်းနှစ်သစ်ကူးပွဲတော်ကို ဒီဇင်ဘာလ(၂၉)ရက်နေ့မှာ တစ်ရက်တာ ကျင်းပပြုလုပ်ခဲ့ကြတဲ့အခါ ယခင်နှစ်ကထက် လာရောက် ဆင်နွှဲတူ ပိုမိုများပြားလာတယ်လို့ သိရပါတယ်။
ပွဲတော်ကို နံနက်(၇)နာရီအချိန်မှာ အလံတော်တင် အခမ်းအနားအဖြစ် ကျင်းပပြုလုပ်ပြီးနောက်မှာ ကရင်နှစ်သစ်ကူးနဲ့ပတ်သက်သည့် အကြောင်းအရာများ၊ ရိုးရာယဉ်ကျေးမှုများ စတာတွေကို သက်ဆိုင်ရာအလိုက် ရှင်းလင်းပြောကြားကြပြီး ပွဲတော်သို့ လာရောက် ဆင်နွှဲသူများကို အကျွေးအမွေးများနဲ့ ဧည့်ခံခဲ့ကြပါတယ်။
ယခုအကြိမ်မှာ လူဦးရေများပြားစွာ လာရောက်ဆင်နွှဲကြတဲ့နည်းတူ နောက်နှစ်များမှာလည်း ပွဲတော်သို့ လာရောက်သူများပြားရန်အတွက်လည်း လုပ်ဆောင်သွားမယ်လို့ တာဝန်ရှိသူက ပြောပါတယ်။
အခုလို ကျင်းပပြုလုပ်တဲ့ပွဲမှာ ဘာသာပေါင်းစုံက ကရင်တိုင်းရင်းသားတွေ စုပေါင်းပါဝင် ဆင်နွှဲကြတဲ့အတွက် ဝမ်းမြောက်ကြောင်း ပညာရေးအငြိမ်းစား တစ်ဦးက ဆိုပါတယ်။
ကရင်အမျိုးသားစုပေါင်းနှစ်သစ်ကူးပွဲတော်ကို ဆန်ဆိုင်း(ခ)ရပ်ကွက်မှာ ပြုလုပ်ခဲ့ပြီး နောက်နှစ်များမှာ ပွဲများကျင်းပပြုလုပ်ရာ နေရာဖြစ်တဲ့ ရှမ်းရိုးမကွင်း သို့မဟုတ် အောင်မြတ်ခန်းမတို့မှာ ကျင်းပသွားနိုင်ရန် အစီအစဉ်ရှိတယ်လို့လည်း သိရပါတယ်။
ပြီးခဲ့တဲ့နှစ်က တာချီလိတ်မြို့မှာ ကျင်းပပြုလုပ်ခဲ့တဲ့ ကရင်နှစ်သစ်ကူးပွဲတော်မှာ လာရောက်ဆင်နွှဲသူ (၃၀၀)ကျော်သာရှိခဲ့သော်လည်း အခု ကျင်းပပြုလုပ်တဲ့ ကရင်အမျိုးသားစုပေါင်းနှစ်သစ်ကူးပွဲတော်မှာ လူဦးရေ (၅၀၀)ကျော် တက်ရောက် ဆင်နွှဲခဲ့တယ်လို့ သိရပါတယ်။
0 comments:
Post a Comment